Նորը` Հայաստանի բժշկական գրադարանում

Երկու տարի առաջ էր, որ լրացավ ՀՀ ԱՆ հանրապետական գիտաբժշկական գրադարանի 70 տարին: Իր գոյատևման ընթացքում գործելով`«Առավելագույնս նպաստել Հայաստանի բժշկագիտության զարգացմանը»նշանաբանով, գրադարանի ողջ աշխատակազմը` տնօրեն Աննա Շիրինյանի ղեկավարությամբ անկոտրում կամք ու մեծ նվիրվածություն է ցուցաբերել, չդադարելով իրականացնել առաջատարի, նորարարի և ուսուցանողի իր դերը հանրապետության բժշկական գրադարանային համալիրում: Նվիրյալների փոքրաթիվ անձնակազմը պայքարելով է հաղթահարել ժամանակների դժվարություններն ու գոյատևման ճանապարհի խոչընդոտները` պահպանելով գրադարանի մշտապես բարձր վարկանիշը:

Վերջերս կայացած բժշկագիտական կառույցների ներկայացուցիչների հավաքը նվիրված էր գրադարանի կոլեկտիվի ջանքերով ստեղծված և արդեն գործող«Էլեկտրոնային բժշկական գրադարան» ծրագրի շնորհանդեսին, որտեղ իրենց շնորհակալական և գովեստի խոսքերով հանդես եկան գիտության կոմիտեի, Երևանի Մ. Հերացու անվան պետական բժշկական համալսարանի, Ս. Ավդալբեկյանի անվան առողջապահության ազգային ինստիտուտի և գիտահետազոտական ինստիտուտների ղեկավարներ, գրադարանային ու լրատվական ցանցի աշխատողներ, ընթերցողներ:

Այս նոր համակարգի շնորհիվ կընդլայնվի գրադարանի և ընթերցողների միջև կապը, կարագանան, կմեծանան բժշկագիտական աղբյուրներից օգտվելու հնարավորությունները: Էլեկտրոնային գրադարանի նպատակն է ստեղծել շուրջօրյա և մշտապես գործող, բժշկագիտության վերջին նորույթներով պարբերաբար համալրվող բարձրորակ տեղեկատվության աղբյուր ինչպես բուժաշխատողների, այնպես էլ ուսանողների, կլինիկական օրդինատորների և ասպիրանտների համար: Այն տրամադրում է նաև հանրամատչելի տեղեկատվություն հանրությանը, հիվանդներին և նրանց հարազատներին:

«Էլեկտրոնային բժշկական գրադարանը» ներկայացված է գիտաբժշկական գրադարանի կայքում` www.medlib.am, որտեղ կարելի է գտնել էլեկտրոնային տարաբնույթ շտեմարաններ, գրքեր և ամսագրեր, բժշկական ատլասներ, կլինիկական փորձարկումների վերաբերյալ ուղեցույցներ, բժշկական տերմինների հայերեն-անգլերեն ու անգլերեն-հայերեն բառարան և այլ տեղեկատվություն գրադարանի գործունեության ու ծառայությունների վերաբերյալ, ինչպես նաև դիտել տեսանյութեր:

Կայքում ներկայացված է էլեկտրոնային գրադարան բաժինը, որը պարբերաբար համալրվում է «Springer Link» հրատարակության էլեկտրոնային բժշկական գրքերով: Ներկայացված տեսաուղեցույցները օգնում են օգտվողին գրադարանի գրացուցակից գտնելու համապատասխան գրականությունը:

Էլեկտրոնային բժշկական գրադարանը` որպես հավաստի տեղեկատվական աղբյուր, կնպաստի բուժաշխատողների մասնագիտական շարունակական զարգացմանը, գիտելիքների մակարդակի բարձրացմանը, կլինիկական որոշումների կայացմանը, ինչպես նաև բուժօգնության որակի բարելավմանը:

Հարցեր, պատասխաններ, մեկնաբանություններ